غني معاي للحب يا حلوة : محمدالبشير علي محمدالحلو

غني معاي للحب يا حـلوة

غني معاي للحب يا حلوة ... تعالي نعيد السيرة الأصـفى
هاك يا حلوة مقاطع سمحة ... تغني الحب في زمناً جـفَّ
هاك يا حلوة أغاني جميلة ... هاك للريدة الأجمل وصفـة
شيلي معاي للريدة أزاهـر ... غنِّي معاي للشوق في زفَّة
نلقى الحب والهناء والبهجة ... نلقى سعادة صنوف مختلفة

***************

يوم لاقيتك وشفت عيونك ... شعـر الحُـب في داخلي اتقفَّى
شفت الشوق ساكن في عيونك ... مـرَّة يبين ومرَّات يتخـفَّى
حسَّ قليبي بريدو تجاهك ... دسَّ هـواك في ضـلعو الأوفـى
وغطَّى الحب من شوف عُزَّالِك ... شالو هواك ضمَّاهو في خِفَّة
عمَّ هواك الحس والفكرة ... وقرَّ هواك في الحضـن الأوفـى

*****************
ويوم لاقيتك صورة ومعنى ... وإنتي معاي لامَّـانا الوقفـة
شفت عيونك ليَّا تنادي ... وفيها الشوق بين خوفة ولهـفة
خوفة تجور أيَّامنا تفرِّق ... نعود لاشوق .. لاريد .. لا عرفة
ولهـفة إذا نادتني عيونك ... ما أوصل بمراكبي المــرفــا
وتبقى اللحظة كئيبة حزيــنة ... يخُش الروح إحساس المنفى
****************
ومرَّة رسيت في شاطي غرامك ... كُنَّا اتنين .. والشوق والإلفة
شفت جمالك كنز محاسن ... تحوي محاسنك ألوان عفَّــــة
وجُوّة الموج ناديت لعيونك ... ليكي أنادي تجيني وأشفـــى
كوني معاي ريِّس للمركب ... قودي زمامو أعدلي الدفّـــَة
حاسبي الموج مايغدر بيهو ... سوقي المركب بي كل خــفّـَة
يصل المركب حد مرساهو ... ونوصل بي أحلامنا الضـفّــَة
وعند الضفَّة نغنِّي هوانا ... ننمِّق فيهو القول لو وفَّـــــى
وتغنِّي معاي للحب يا حلوة



محمد البشير علي محمد الحلو
11.11.2002
هاتف : 00249123880436